January 1, 2014

മലയാളസിനിമ 2013:ഒരു തിരിഞ്ഞു നോട്ടം


               മലയാളസിനിയെ സംബന്ധിച്ചിടത്തോളം ഏറെ പ്രത്യേകതകള്‍ നിറഞ്ഞ വര്‍ഷമായിരുന്നു 2013. പ്രദര്‍ശനത്തിനെത്തിയ പല നല്ല ചിത്രങ്ങളും സമ്മാനിച്ച ഓര്‍മ്മകള്‍ കൊണ്ടും, സിനിമാലോകത്തെ പല പ്രതിഭകളുടേയും വിയോഗം കൊണ്ടുമെല്ലാം പോയ വര്‍ഷം സിനിമാ പ്രേമികളുടെ മനസ്സില്‍ നിറഞ്ഞു നില്‍ക്കുക തന്നെ ചെയ്യും. അന്നയും റസൂലും മുതല്‍ ഏഴു സുന്ദര രാത്രികളും, ഒരു ഇന്ത്യന്‍ പ്രണയകഥയും വരെ 158 ചിത്രങ്ങളാണ് പോയ വര്‍ഷം മലയാളത്തില്‍ റിലീസ് ചെയ്യപ്പെട്ടത്. മൊഴിമാറ്റം ചെയ്ത് വന്ന 12 ചിത്രങ്ങള്‍ വേറെയും. മുന്‍വര്‍ഷങ്ങളെ അപേക്ഷിച്ച് റിലീസ് ചെയ്യപ്പെട്ട ചിത്രങ്ങളുടെ എണ്ണത്തില്‍ വന്‍ വര്‍ദ്ധനവ് ഉണ്ടായെങ്കിലും നല്ല സിനിമകളുടെ എണ്ണം നാമമാത്രമായിരുന്നു. എന്നിരുന്നാലും ഒട്ടേറെ പുതുമയാര്‍ന്ന പ്രമേയങ്ങളും, അതിലേറെ പ്രതീക്ഷകളും സമ്മാനിച്ചു കൊണ്ടാണ് 2013 പോയ്‌ മറഞ്ഞത്.

  • അന്നയുടേയും റസൂലിന്റേയും ജനവരി:
             ജനവരിയില്‍ നല്ലൊരു ദൃശ്യാനുഭവം സമ്മാനിക്കാനായത് ഛായാഗ്രാഹകനായ രാജീവ് രവിയുടെ പ്രഥമ സംവിധാന സംരഭമായിരുന്ന 'അന്നയും റസൂലും' എന്ന ചിത്രത്തിനു മാത്രമാണ്. വ്യത്യസ്ഥ മതവിഭാഗത്തില്‍ പെട്ടവര്‍ തമ്മിലുള്ള പ്രണയം അവരിലും, അവരുടെ കുടുംബങ്ങളിലും, സമൂഹത്തിലും സൃഷ്ടിക്കുന്ന പ്രശ്നങ്ങളും, അതിന്റെ തുടര്‍ചലനങ്ങളുമായിരുന്നു ഈ സിനിമയുടെ ഇതിവൃത്തം. അന്നയായി വേഷമിട്ട ആന്‍ഡ്രിയയും, റസൂലായി വേഷമിട്ട ഫഹദും അവരവരുടെ റോളുകള്‍ ഭംഗിയാക്കി. പാട്ടുകളും ദൃശ്യങ്ങളുമെല്ലാം മനോഹരമായിരുന്നു. ചിത്രത്തിന്റെ ദൈര്‍ഘ്യം ചിലയിടങ്ങളില്‍ ഇഴച്ചിലുണ്ടാക്കിയെങ്കിലും അത് സിനിമയുടെ മനോഹാരിതയെ കാര്യമായി ബാധിച്ചില്ല.
           പേരിലെ പുതുമയുമായെത്തിയ ചിത്രമായിരുന്നു 'നി കൊ ഞാ ചാ'. സൗഹൃദവും, പ്രണയവും, പ്രതികാരവുമൊക്കെയായിരുന്നു ഇതിലെ പ്രതിപാദ്യ വിഷയങ്ങള്‍. പേരിനോട്‌ ആളുകള്‍ക്ക് തോന്നിയ ഇഷ്ടം നില നിര്‍ത്താന്‍ സിനിമയ്ക്ക് കഴിയാത്തതിനാല്‍ അതൊരു ശരാശരി ചിത്രമായി മാറി. അച്ഛനുറങ്ങാത്ത വീട് എന്ന ലാല്‍ ജോസ് ചിത്രത്തിന്റെ തുടര്‍ച്ചയായെത്തിയ ലിസമ്മയുടെ വീട് പരാജയപ്പെട്ട രണ്ടാം ഭാഗങ്ങളുടെ പട്ടികയില്‍ സ്ഥാനം പിടിച്ചു. ബോബന്‍ സാമുവല്‍ സംവിധാനം ചെയ്ത റോമന്‍സ് തിയേറ്ററുകളില്‍ വിജയമായെങ്കിലും യുക്തിക്ക് നിരക്കാത്ത കഥയും, തരം താണ കുറെ തമാശകളും മാത്രമായിരുന്നു ആ ചിത്രത്തിന്റെ സംഭാവന. കുഞ്ചാക്കോ ബോബനും ബിജൂ മേനോനുമായിരുന്നു പ്രധാന വേഷങ്ങളിലെത്തിയത്. 1989-ല്‍ പുറത്തിറങ്ങിയ 'വീ ആര്‍ നോ എയ്ഞ്ചല്‍സ്' എന്ന ചിത്രത്തിന്റെ മലയാളം പതിപ്പായിരുന്നു ഇത്. ഏറെ പ്രതീക്ഷയുമായെത്തിയ കമ്മത്ത് ആന്റ് കമ്മത്ത്, ലോക്പാല്‍ എന്നീ സൂപ്പര്‍താര ചിത്രങ്ങള്‍ നിലവാരത്തകര്‍ച്ചയുടെ പാരമ്യം കാണിച്ചു തന്നു. ഐസക്ക് ന്യൂട്ടണ്‍ സണ്‍ ഓഫ് ഫിലിപ്പോസ്, പ്ലയേഴ്സ് തുടങ്ങി വേറെയും ഒരുപാട് സിനിമകള്‍ അവയുടെ പാത പിന്തുടര്‍ന്നു.

  • ജെ.സി ഡാനിയേലും, ജോയ് മാത്യുവും: 
            രണ്ട് നല്ല സിനിമകള്‍ മലയാള സിനിമയ്ക്ക് സംഭാവന ചെയ്തുകൊണ്ടാണ് ഫെബ്രുവരി കടന്നു പോയത്. ജെ.സി ഡാനിയേലിന്റെ കഥ പറഞ്ഞ സെല്ലുലോയ്ഡും, ജോയ് മാത്യു സംവിധാനം ചെയ്ത ഷട്ടറും. മലയാളസിനിമയുടെ പിതാവായ ജെ.സി ഡാനിയേലിന് വൈകിയാണെങ്കിലും നല്‍കിയ മരണാനന്തര ബഹുമതിയായിരുന്നു കമല്‍ അണിയിച്ചൊരുക്കിയ സെല്ലുലോയ്ഡ് എന്ന ചിത്രം. ജെ.സി ഡാനിയേലിന്റെയും അതുവഴി ആദ്യ മലയാള സിനിമയുടേയും കൂടി കഥയാണ് സെല്ലുലോയ്ഡ്‌ നമ്മോട് പറഞ്ഞത്. മലയാളത്തിലെ ആദ്യ ചലചിത്രമായ 'വിഗതകുമാരന്‍' അണിയിച്ചൊരുക്കാന്‍ ജെ.സി ഡാനിയേല്‍ എന്ന മഹാപ്രതിഭ അനുഭവിച്ച കഷ്ടപ്പാടുകളും, അതു മൂലം അദ്ദേഹത്തിന്റെ ജീവിതത്തിലുണ്ടായ നഷ്ടങ്ങളും ആയിരുന്നു ഈ ചിത്രത്തിന്റെ ഇതിവൃത്തം. അഭിനയവും, സംഗീതവും, സംവിധാനവും എല്ലാം മികച്ചതായിരുന്നു. വളരെ വലിയ ഒരു തെറ്റിന്റെ തിരുത്തലിനു കൂടിയാണ് ഈ ചിത്രം സാക്ഷ്യം വഹിച്ചത്.
             ഏറെ പ്രേക്ഷക പ്രശംസ പിടിച്ചു പറ്റിയ ചിത്രമായിരുന്നു ജോണ്‍ എബ്രഹാം സംവിധാനം ചെയ്ത് 1986-ല്‍ പുറത്തിറങ്ങിയ ' അമ്മ അറിയാന്‍'. ആ ചിത്രത്തില്‍ നായകവേഷം കൈകാര്യം ചെയ്ത ജോയ് മാത്യുവിന്റെ രണ്ടാം വരവ് ഷട്ടര്‍ എന്ന ചിത്രം സംവിധാനം ചെയ്തുകൊണ്ടായിരുന്നു. ആ വരവ് അദ്ദേഹം ഉജ്ജ്വലമാക്കുകയും ചെയ്തു. ചിത്രത്തിലെ ലാലിന്റെയും, സജിത മഠത്തിലിന്റെയും അഭിനയം, തിരക്കഥയിലെയും സംവിധാനത്തിലെയും മികവ് എന്നിവ എടുത്തു പറയേണ്ടിയിരിക്കുന്നു. നത്തോലി ഒരു ചെറിയ മീനല്ല എന്ന ചിത്രം പേരു കൊണ്ടും, ഫഹദ് ഫാസിലിന്റെ സാന്നിധ്യം കൊണ്ടും റിലീസിനു മുമ്പ് ഏറെ പ്രതീക്ഷകശ്രദ്ധ പിടിച്ചു പറ്റിയ ഒരു ചിത്രമായിരുന്നു. അഭിനേതാക്കളാരും അവരുടെ വേഷങ്ങള്‍ മോശമാക്കിയില്ലെങ്കിലും തിരക്കഥയിലെ പാളിച്ച ചിത്രത്തിന് വിനയായി. വഴക്കു എന്‍ 18/9 എന്ന തമിഴ് ചിത്രം റീമേക്ക് ചെയ്ത് ബ്ലാക്ക് ബട്ടര്‍ഫ്ലൈ എന്ന പേരില്‍ മലയാളത്തിലെത്തിച്ചപ്പോള്‍ നല്ലൊരു പ്രമേയമായിരുന്നിട്ടും തമിഴിലെ വിജയം ഇവിടെ ആവര്‍ത്തിക്കാന്‍ ആ ചിത്രത്തിന് കഴിയാതെ പോയി. ഏറെ കൊട്ടിഗ്ഘോഷിച്ചെത്തിയ വിനയന്റെ ഡ്രാക്കുള 2012 3D എന്ന ചിത്രം തീര്‍ത്തും അസഹനീയമായിരുന്നു എന്ന് പറയാതെ വയ്യ. ജയസൂര്യ-അനൂപ്‌ മേനോന്‍ കൂട്ടുകെട്ടില്‍ പിറന്ന ഡേവിഡ് ആന്റ് ഗോലിയാത്ത് എന്ന ചിത്രം അനൂപ്‌ മേനോന്റെ തിരക്കഥയില്‍ വിശ്വാസമര്‍പ്പിച്ചര്‍ക്കുള്ള പ്രഹരമായി മാറി. ട്രെയിന്‍ യാത്രയ്ക്കിടെ ദാരുണമായി കൊല്ലപ്പെട്ട സൗമ്യയുടെ കഥ പറഞ്ഞ ബ്രേക്കിംഗ് ന്യൂസ് ലൈവ്, ടിനി ടോം ആദ്യമായി നായക കഥാപാത്രത്തെ അവതരിപ്പിച്ച ഹൗസ് ഫുള്‍ തുടങ്ങിയ ചിത്രങ്ങളൊന്നും പ്രതീക്ഷയ്ക്കൊത്തുയര്‍ന്നില്ല.

  •  കുമരങ്കരിയിലേക്കൊരു മാര്‍ച്ച് :
           കുമരങ്കരി എന്ന സാങ്കല്‍പ്പിക ഗ്രാമത്തിന്റേയും, അവിടുത്തെ ബാന്റ് സംഘത്തിന്റേയും കഥ പറഞ്ഞു കൊണ്ട് ലിജോ ജോസ് പല്ലിശ്ശേരി സംവിധാനം ചെയ്ത ആമേന്‍ ആയിരുന്നു മാര്‍ച്ച് മാസത്തിലെ താരം. ഗുക്ക- ഡിസ്റ്റന്റ് ട്രമ്പറ്റ് എന്ന പേരില്‍ 2006-ല്‍ പുറത്തിറങ്ങിയ സെര്‍ബിയന്‍ ചിത്രവുമായി ചെറുതല്ലാത്ത സാമ്യങ്ങള്‍ ഈ ചിത്രത്തിന് ഉണ്ടെങ്കിലും മികച്ച ഒരു സിനിമയായിരുന്നു ആമേന്‍. ഇന്ദ്രജിത്ത്, ഫഹദ് ഫാസില്‍, സ്വാതി റെഡ്ഡി തുടങ്ങിയവരാണ് മുഖ്യ വേഷങ്ങള്‍ കൈകാര്യം ചെയ്തത്. അതിമനോഹരമായി ഛായാഗ്രഹണം നിര്‍വ്വഹിച്ച അഭിനന്ദന്‍ രാമാനുജം വളരെ വലിയ അഭിനന്ദനമര്‍ഹിക്കുന്നു. എല്ലാവരും നല്ല അഭിനയം കാഴ്ച വച്ചു. പ്രശാന്ത് പിള്ളയുടെ സംഗീത സംവിധാനവും മികവ് പുലര്‍ത്തി. അസഭ്യ വാക്കുകളുടെ പ്രയോഗം മാത്രം ഒഴിവാക്കാമായിരുന്നു.

          ദീപു അന്തിക്കാടിന്റെ ആദ്യ സംവിധാന സംരംഭമായ ലക്കി സ്റ്റാര്‍ തിയേറ്ററുകളിലെത്തിയതും മാര്‍ച്ച് മാസത്തിലായിരുന്നു. 24 വര്‍ഷം മുമ്പ് ലോഹിതദാസ്-സിബി മലയില്‍-മോഹന്‍ലാല്‍ കൂട്ടുകെട്ടില്‍ പിറന്ന ദശരഥം എന്ന ക്ലാസിക്ക് ചിത്രം കൈകാര്യം ചെയ്ത അതേ പ്രമേയം തന്നെയായിരുന്നു ജയറാം, മുകേഷ്, രചന നാരായണന്‍കുട്ടി എന്നിവര്‍ മുഖ്യ വേഷങ്ങളിലഭിനയിച്ച ലക്കി സ്റ്റാറിന്റേതും. ഒരു ശരാശരി ചിത്രം എന്നതിനപ്പുറത്തേക്ക് സഞ്ചരിക്കാന്‍ ആ ചിത്രത്തിനായില്ല. കിളി പോയി എന്ന ചിത്രം ശ്രദ്ധിക്കപ്പെട്ടെങ്കിലും യുവത്വത്തിന്റെ ആഘോഷവും, അസഭ്യവര്‍ഷവും, ലഹരി പദാര്‍ത്ഥങ്ങളുടെ അളവറ്റ ഉപയോഗവും ചിത്രീകരിക്കാന്‍ വേണ്ടി മാത്രം എടുത്ത ഒരു സിനിമ എന്ന് അതിനെ വിളിച്ചാലും കുറ്റം പറയാനാവില്ല. ലാല്‍ ജോസിന്റെ ശിഷ്യനായ സലാം ബാപ്പു സ്വതന്ത്ര സംവിധായകനായി അരങ്ങേറ്റം കുറിച്ച ചിത്രമായിരുന്നു റെഡ് വൈന്‍. ആദ്യ ചിത്രത്തില്‍ തന്നെ ഒരു വലിയ താരനിരയെ ലഭിച്ചിട്ടും അത് വേണ്ട വിധത്തില്‍ പ്രയോജനപ്പെടുത്താന്‍ സംവിധായകന് കഴിഞ്ഞില്ല. മോശമല്ലാത്ത ഒരു പ്രമേയത്തിന്റെ തിരക്കഥയിലുണ്ടായ പാളിച്ചകള്‍ സിനിമയേയും പ്രതികൂലമായി ബാധിച്ചു. 2012-ല്‍ പുറത്തിറങ്ങിയ ഓര്‍ഡിനറി എന്ന വിജയചിത്രത്തിന്റെ സംവിധായകനായ സുഗീതിന്റെ രണ്ടാം വരവ് ത്രീ ഡോട്ട്സ് എന്ന ചിത്രത്തിലൂടെ ആയിരുന്നു. പക്ഷെ ഓര്‍ഡിനറിയിലെ വിജയഫോര്‍മുലയായ കുഞ്ചാക്കോ ബോബന്‍-ബിജുമേനോന്‍ കൂട്ടുകെട്ടിനെയും അതിനൊപ്പം പ്രതാപ് പോത്തന്‍, നരേന്‍ തുടങ്ങിയവരേയും അണിനിരത്തിയിട്ടും ത്രീ ഡോട്ട്സ്  ഒരു നല്ല സിനിമയായി മാറിയില്ല. കുട്ടീം കോലും, റബേക്ക ഉതുപ്പ് കിഴക്കേമല, ഇത് പാതിരാമണല്‍ എന്നിങ്ങനെ എന്തിനോ വേണ്ടി ഉണ്ടായ ചില സിനിമകളും മാര്‍ച്ചില്‍ തിയേറ്ററുകളിലെത്തി.

  • ഏപ്രിലിലെ വേനല്‍മഴയായി ഇമ്മാനുവല്‍ : 
               'ദൈവം നമ്മോടു കൂടെ' എന്ന ടാഗ് ലൈനുമായാണ് ലാല്‍ ജോസ്-മമ്മൂട്ടി ചിത്രമായ ഇമ്മാനുവല്‍ പ്രദര്‍ശനത്തിനെത്തിയത്. ഇമ്മാനുവല്‍ കണ്ടിറങ്ങിയപ്പോള്‍ വില്‍ സ്മിത്ത് നായകവേഷത്തിലഭിനയിച്ച 'പഴ്സ്യൂട്ട് ഓഫ് ഹാപ്പിനസ്' ആണ് ഒര്‍മ്മ വന്നത്. പഴ്സ്യൂട്ട് ഓഫ് ഹാപ്പിനസില്‍ ഒരു ജോലി നേടാനുള്ള നായകന്റെ തത്രപ്പാടും, കുടുംബജീവിതം മുന്നോട്ടു കൊണ്ടുപോകാനുള്ള പ്രതിസന്ധികളുമാണ് നമുക്ക് കാണാനാവുക. ഇമ്മാനുവലിലാകട്ടെ  ജോലി നഷ്ടപ്പെടുന്നതും, പിന്നീട് ലഭിക്കുന്ന ജോലി നിലനിര്‍ത്താനുള്ള നായകന്റെ അത്യധ്വാനവും, കുടുംബ പ്രാരാബ്ദങ്ങളുമെല്ലാം പ്രതിപാദിക്കപ്പെടുന്നു. ടൈറ്റില്‍ കാരക്ടരായി മമ്മൂട്ടിയും, ഇമ്മാനുവലിന്റെ ഓഫീസിലെ മാനേജരായി ഫഹദ് ഫാസിലും നല്ല പ്രകടനം കാഴ്ച വച്ചു. ഒരു തുടക്കക്കാരനായിട്ടും വിജീഷ് എ.സിയുടെ തിരക്കഥ കുറ്റമറ്റതായതില്‍ അദ്ദേഹത്തിന് അഭിമാനിക്കാം.
               20 വര്‍ഷത്തിനു ശേഷം മോഹന്‍ലാലും സിദ്ദീഖും ഒന്നിച്ചപ്പോള്‍ മിനിമം ഒരു സൂപ്പര്‍ഹിറ്റില്‍ കുറഞ്ഞതൊന്നും പ്രേക്ഷകര്‍ പ്രതീക്ഷിച്ചിട്ടുണ്ടാവില്ല. എന്നാല്‍ ലേഡീസ് ആന്റ് ജെന്റില്‍ മാന്‍ തീര്‍ത്തും നിരാശപ്പെടുത്തി. ഒരു നല്ല തിരക്കഥയുടെ അഭാവം തന്നെയാണ് ഈ ചിത്രം നേരിട്ട ഏറ്റവും വലിയ പരാജയം. മോഹന്‍ലാല്‍ എന്ന പ്രതിഭയുടേയും നാല് മുന്‍നിര നായികമാരുടേയും സാന്നിധ്യമുണ്ടായിട്ടും സിദ്ദീഖിന് അത് വേണ്ട വിധത്തില്‍ പ്രയോജനപ്പെടുത്താനായില്ല.
           വിവിധ തരത്തിലുള്ള വികലാംഗരായി വേഷമിടുക എന്ന ദിലീപിന്റെ ആഗ്രഹമായിരിക്കണം സൗണ്ട് തോമ എന്ന വികലസിനിമയുടെ സൃഷ്ടിക്കു പിന്നില്‍. നായകന്  മുറിച്ചുണ്ടാനായി അഭിനയിക്കാന്‍ വേണ്ടി ഉണ്ടാക്കിയെടുത്ത ഒരു കഥയില്‍ വേറെ കുറെ ആളുകള്‍ വേഷം കെട്ടിയാടിയിരിക്കുന്നു എന്നതിനപ്പുറം സൗണ്ട് തോമയില്‍ യാതൊന്നുമില്ല.

  • മുംബൈ പോലീസിന്റെ അകമ്പടിയില്‍ മെയ്‌ :
           മെയ് മാസത്തില്‍ തിയേറ്ററുകളിലെത്തിയ ചിത്രങ്ങളില്‍ ഏറ്റവും മികച്ചത് മുംബൈ പോലീസ് തന്നെയായിരുന്നു എന്ന് നിസ്സംശയം പറയാം. ഒരു സസ്പെന്‍സ് ത്രില്ലര്‍ എന്നതിനപ്പുറം പ്രമേയം കൊണ്ടും അവതരണം കൊണ്ടും ഈ ചിത്രം മികവ് പുലര്‍ത്തി. ബോബി സഞ്ജയ്‌ ടീമിന്റെ തിരക്കഥയുടെ കെട്ടുറപ്പും, റോഷന്‍ ആന്‍ഡ്രൂസിന്റെ സംവിധാനമികവും, പ്രിഥ്വിരാജ്, ജയസൂര്യ, റഹ്മാന്‍ എന്നിവരുടെ മികച്ച അഭിനയവും കൂടിച്ചേര്‍ന്നതിന്റെ പരിണിതഫലമായിരുന്നു മുംബൈ പോലീസിന്റെ വിജയം. അത്തരമൊരു വേഷം ചെയ്യാന്‍ ധൈര്യം കാണിച്ച പ്രിഥ്വിരാജ് വളരെ വലിയ അഭിനന്ദനമര്‍ഹിക്കുന്നു.
           ലണ്ടന്‍ മലയാളികളുടെ കഥയുമായെത്തിയ ശ്യാമപ്രസാദ് ചിത്രമായിരുന്നു ഇംഗ്ലീഷ്. പരസ്പരം ബന്ധപ്പെട്ടു കിടക്കുന്ന ഒരു കൂട്ടം മലയാളികളുടെ മാനസികസംഘര്‍ഷങ്ങളിലൂടെയും ജീവിതസാഹര്യങ്ങളിലൂടെയുമാണ് ചിത്രത്തിന്റെ സഞ്ചാരം. ശ്യാമപ്രസാദ് എന്ന സംവിധായക പ്രതിഭയുടെ മറ്റു സിനിമകളോട് കിട പിടിക്കുന്ന ചിത്രമായിരുന്നില്ല ഇത്. മുകേഷ്, നദിയ മൊയ്തു, ജയസൂര്യ എന്നിവര്‍ നല്ല അഭിനയം കാഴ്ച വച്ചു എന്നതൊഴിച്ചാല്‍ അത്ര നല്ലൊരു ദൃശ്യാനുഭവം സമ്മാനിക്കാന്‍ ഇംഗ്ലീഷിനായില്ല.
          മെയ് മാസത്തില്‍ പുറത്തിറങ്ങിയ മറ്റൊരു ചിത്രം അല്‍ഫോണ്‍സ് പുത്രന്‍ സംവിധായകന്‍ എന്ന നിലയില്‍ അരങ്ങേറ്റം കുറിച്ച നേരം ആയിരുന്നു. യുവരക്തങ്ങളെ മാത്രം ലക്ഷ്യം വച്ചുള്ള ഒരാഘോഷ ചിത്രമായിരുന്നു നേരം. ഒരേ സമയം തമിഴിലും മലയാളത്തിലും റിലീസ് ചെയ്ത ഈ ചിത്രത്തെ മലയാളസിനിമയില്‍ പുറത്തിറങ്ങിയ പരീക്ഷണ ചിത്രങ്ങളുടെ പട്ടികയില്‍ ഉള്‍പ്പെടുത്താം. പൂര്‍ണ്ണമായ അര്‍ത്ഥത്തില്‍ ഒരു മികച്ച ചിത്രം എന്ന് നേരത്തെ വിശേഷിപ്പിക്കാനാവില്ലെങ്കിലും കണ്ടിരിക്കാവുന്ന ചിത്രം തന്നെയാണിത്. ടോം ടൈക്കറുടെ 'റണ്‍ ലോല റണ്‍' എന്ന ജര്‍മ്മന്‍ ചിത്രത്തിന്റെ ഓര്‍മ്മപ്പെടുത്തല്‍ കൂടിയാണ് നേരം. അക്കു അക്ബര്‍-ജയറാം കൂട്ടുകെട്ടില്‍ പുറത്തിറങ്ങിയ ഭാര്യ അത്ര പോര എന്ന ചിത്രം പ്രതീക്ഷയ്ക്കൊത്തുയര്‍ന്നില്ല. ഇതേ ടീമിന്റെ വെറുതെ ഒരു ഭാര്യ എന്ന ചിത്രത്തിന്റെ വിജയമായിരിക്കും ഇത്തരത്തില്‍ ഒരു പരീക്ഷണത്തിന് അവരെ പ്രേരിപ്പിച്ചത്. ആറു സുന്ദരിമാരുടെ കഥ, ഹോട്ടല്‍ കാലിഫോര്‍ണിയ തുടങ്ങിയ ചിത്രങ്ങള്‍ക്കെല്ലാം നിരാശ മാത്രമാണ്  നല്‍കാനായത്. 

  • രാഷ്ട്രീയ വിമര്‍ശനവും, സുന്ദരികളും, തേനീച്ചയും: 
               ഒട്ടേറെ വിവാദങ്ങളുടെ അകമ്പടിയോടെ ജൂണ്‍ മാസത്തില്‍ പുറത്തിറങ്ങിയ ചിത്രമായിരുന്നു ലെഫ്റ്റ് റൈറ്റ് ലെഫ്റ്റ്. വലതുപക്ഷത്തിന്റെ കണ്ണുകളിലൂടെ ഇടതുപക്ഷത്തെ നോക്കിക്കാണുവാനുള്ള ബോധപൂര്‍വ്വമോ അല്ലാത്തതോ ആയ ശ്രമമാണ് ചിത്രത്തിന്റെ അണിയറപ്രവര്‍ത്തകര്‍ നടത്തിയിട്ടുള്ളത്. ചിത്രം മുന്നോട്ടു വച്ച പല രാഷ്ട്രീയ നിലപാടുകളോടും  ശക്തമായ വിയോജിപ്പാണ് എനിക്കുള്ളത് എങ്കിലും ഒരു ചലച്ചിത്രമെന്ന നിലയില്‍ ലെഫ്റ്റ് റൈറ്റ് ലെഫ്റ്റ് മികവ് പുലര്‍ത്തുന്നു എന്ന കാര്യം വിസ്മരിക്കുന്നില്ല. ചിത്രത്തിന് തിരക്കഥയെഴുതുകയും, ചെഗുവേര റോയ് എന്ന വേഷത്തെ കൈകാര്യം ചെയ്യുകയും ചെയ്ത മുരളി ഗോപി പ്രത്യേക അഭിനന്ദനം അര്‍ഹിക്കുന്നു. കൈതേരി സഹദേവനായി ഹരീഷ് പരേഡിയും, വട്ട് ജയനായി ഇന്ദ്രജിത്തും മികച്ച അഭിനയം കാഴ്ച വച്ചു.സംവിധായകന്‍ എന്ന നിലയില്‍ അരുണ്‍ കുമാര്‍ അരവിന്ദും മികവ് പുലര്‍ത്തി.            
           ചിത്രമേള, കേരള കഫേ, ഒരു യാത്രയില്‍ തുടങ്ങിയ  മലയാളത്തിലെ ആന്തോളജി സിനിമകളുടെ ഇടയില്‍ സ്ഥാനം നേടിയ ചിത്രമാണ് 'അഞ്ചു സുന്ദരികള്‍'. ഷൈജു ഖാലിദ്, സമീര്‍ താഹിര്‍, ആഷിക്ക് അബു, അമല്‍ നീരദ്, അന്‍വര്‍ റഷീദ് എന്നിവരായിരുന്നു ഇതിലെ അഞ്ച് കഥകള്‍ക്ക് സംവിധാനം നിര്‍വ്വഹിച്ചത്. ഇതില്‍ സേതുലക്ഷ്മിയും കുള്ളന്റെ ഭാര്യയും ആണ്  മികച്ച നിലവാരം പുലര്‍ത്തിയ കഥകള്‍. ആമിയും ഇഷയും ശരാശരിയിലൊതുങ്ങിയപ്പോള്‍ ഗൗരി തീര്‍ത്തും നിരാശപ്പെടുത്തി.
           നേരം എന്ന ചിത്രത്തിനു സമാനമായി യുവാക്കളെ മാത്രം ലക്ഷ്യമിട്ടു കൊണ്ട് തിയേറ്ററുകളിലെത്തിയ ചിത്രമായിരുന്നു ഹണീ ബീ. സംവിധായകനും നടനുമായ ലാലിന്റെ മകന്‍ ജീന്‍ പോള്‍ ലാലിന്റെ കന്നിച്ചിത്രമായിരുന്നു ഇത്. യുക്തിക്ക് നിരക്കാത്ത കഥയും, അസഭ്യ വാക്കുകളുടെ അതിപ്രസരവുമെല്ലാം സാങ്കേതിക വൈദഗ്ദ്യം കൊണ്ടും അഭിനയമികവു കൊണ്ടും മറികടക്കാനുള്ള ശ്രമമാണ് ചിത്രത്തില്‍ കാണാനാവുക. അധികം ബോറടിക്കാതെ കണ്ടിരിക്കാവുന്ന ഒരു ചിത്രമായി ഇതിനെ കാണാം. എബിസിഡി: അമേരിക്കന്‍ ബോണ്‍ കണ്‍ഫ്യൂസ്ഡ്‌ ദേശി എന്ന ചിത്രവും ഹണി ബീയുടെ ഗണത്തില്‍ ഉള്‍പ്പെടുത്താവുന്ന ഒന്നാണ്. പേര് സൂചിപ്പിക്കുന്നത് പോലെ തന്നെ അമേരിക്കയില്‍  സുഖലോലുപരായി ജീവിച്ച രണ്ട് ചെറുപ്പക്കാര്‍ക്ക് കേരളത്തില്‍ വച്ച് അനുഭവിക്കേണ്ടി വരുന്ന തിക്താനുഭവങ്ങളായിരുന്നു ഈ ചിത്രത്തിന്റെ പ്രമേയം.

  • 101 ചോദ്യങ്ങള്‍: ചെറിയ വലിയ സിനിമ.
                 മനോഹരമായ ഒരു സിനിമയായിരുന്നു 101 ചോദ്യങ്ങള്‍. കൈകാര്യം ചെയ്ത പ്രമേയം, സംവിധാനം, അഭിനയം തുടങ്ങിയ എല്ലാ തലങ്ങളിലും ഈ ചിത്രം മികവ് പുലര്‍ത്തി. അതിനുള്ള അംഗീകാരമായാണ് മികച്ച ബാലതാരത്തിനും, മികച്ച നവാഗത സംവിധായകനുമുള്ള ദേശീയ പുരസ്കാരങ്ങള്‍ ഈ ചിത്രത്തിന് ലഭിച്ചത്. തിരുവനന്തപുരത്തു വച്ചു നടന്ന പതിനെട്ടാമത് അന്തര്‍ദേശീയ ചലച്ചിത്രോത്സവത്തില്‍ ഓഡിയന്‍സ് പ്രൈസ് വിഭാഗത്തില്‍ മികച്ച ഫീച്ചര്‍ ഫിലിമിനുള്ള രജത ചകോരവും ഈ ചിത്രം സ്വന്തമാക്കി. അനില്‍ കുമാര്‍ ബൊക്കാറോ എന്ന എന്ന അഞ്ചാം ക്ലാസുകാരനെ അവതരിപ്പിച്ച മിനോണ്‍ എന്ന ബാലതാരത്തിന്റെ മികച്ച പ്രകടനത്തിന് ഈ ചിത്രം സാക്ഷ്യം വഹിച്ചു. അദ്ധ്യാപകന്റെ(ഇന്ദ്രജിത്ത്) നിര്‍ദ്ദേശത്തെ തുടര്‍ന്ന് വിദ്യാര്‍ത്ഥിയായ അനില്‍ കുമാര്‍ ബൊക്കാറോ 101 ചോദ്യങ്ങള്‍ തയ്യാറാക്കി നല്‍കുന്നതാണ് ചിത്രത്തിന്റെ ഇതിവൃത്തം. തന്റെ ആദ്യ ചിത്രം തന്നെ മനോഹരമായി സംവിധാനം നിര്‍വ്വഹിച്ചിരിക്കുന്നതിലൂടെ സിദ്ധാര്‍ഥ് ശിവ എന്ന ഒരു പുതിയ സംവിധായക പ്രതിഭയുടെ പിറവിക്ക് കൂടിയാണ് ഈ ചിത്രം നിദാനമായിത്തീര്‍ന്നത്.
               അച്ഛനെ അന്വേഷിച്ചുള്ള പതിനെട്ടു വയസ്സുകാരന്‍ മകന്റെ യാത്ര മുഖ്യ വിഷയമാക്കി രാജ് പ്രഭാവതി മേനോന്‍ അണിയിച്ചൊരുക്കിയ ചിത്രമാണ് ബഡ്ഡി. ദശരഥം എന്ന ചിത്രമാണ് ബഡ്ഡിയിലേക്ക് തന്നെ നയിച്ചത് എന്ന് സംവിധായകന്‍ ഏതോ അഭിമുഖത്തില്‍ പറഞ്ഞതായി ഓര്‍ക്കുന്നു. പ്രമേയം കൊണ്ടല്ലാതെ മറ്റൊരു വിധത്തിലും ദശരഥവുമായി ബന്ധിപ്പിക്കാനുള്ള ഒരു യോഗ്യതയും ഈ ചിത്രത്തിനില്ല.

  • ഓര്‍മ്മകളും വര്‍ണ്ണക്കൂട്ടുകളുമായി ആഗസ്റ്റ്‌:
              ജിത്തു ജോസഫിന്റെ മെമ്മറീസും ശ്യാമപ്രസാദിന്റെ ആര്‍ട്ടിസ്റ്റും ആയിരുന്നു ആഗസ്റ്റ്‌ മാസത്തില്‍ പ്രദര്‍ശനത്തിനെത്തിയ ഏറ്റവും മികച്ച ചിത്രങ്ങള്‍. മൈക്കിള്‍ എന്ന ചിത്രകാരന്റേയും, അയാളുടെ ഭാര്യയായ ഗായത്രിയുടേയും കഥയാണ് ആര്‍ട്ടിസ്റ്റ് പറഞ്ഞത്. ജീവിതത്തില്‍ നേരിടേണ്ടി വരുന്ന വെല്ലുവിളികള്‍ മൂലം മൈക്കിളിന്റെ സ്വഭാവത്തിലുണ്ടാകുന്ന മാറ്റങ്ങള്‍ തന്മയത്വത്തോടെ അവതരിപ്പിക്കാന്‍ ഫഹദ് ഫാസിലിനും, തന്റെ കരിയറിലെ ഏറ്റവും മികച്ച കഥാപാത്രമായ ഗായത്രിയെ ഈ ചിത്രത്തിലൂടെ അവതരിപ്പിക്കാന്‍ ആന്‍ അഗസ്റ്റിനും കഴിഞ്ഞു. പരിതോഷ് ഉത്തം എഴുതിയ 'ഡ്രീംസ് ഇന്‍ പ്രഷ്യന്‍ ബ്ലൂ' എന്ന നോവലിന്റെ ചലച്ചിത്രാവിഷ്കാരമായിരുന്നു ഈ ചിത്രം. ഇംഗ്ലീഷ് എന്ന ചിത്രം പ്രേക്ഷകര്‍ക്ക് സമ്മാനിച്ച നിരാശ ഈ ചിത്രത്തിലൂടെ ഇല്ലാതാക്കാന്‍ ശ്യാമപ്രസാദിനായി.     
        ഭാര്യയുടെയും മകളുടെയും വേര്‍പ്പാടില്‍ മനം നൊന്ത് ഒരു മുഴുത്ത മദ്യപാനിയായി ജീവിതം തള്ളി നീക്കുന്ന സാം അലക്സ് എന്ന പോലീസുദ്യോഗസ്ഥന്റെ കഥയാണ് മെമ്മറീസ് പറഞ്ഞത്. ഒരു കൊലപാതക പരമ്പരയുടെ ചുരുളഴിയിക്കാനുള്ള ദൗത്യം സാം അലക്സില്‍ വന്നു ചേരുന്നതും ഒട്ടും താത്പര്യമില്ലാതിരുന്നിട്ടും ഒടുവില്‍ ആ കേസന്വേഷണം അയാള്‍ക്ക് ഏറ്റെടുക്കേണ്ടി വരുന്നതുമാണ് സിനിമയുടെ ഇതിവൃത്തം. ജിത്തുജോസഫിന്റെ സംവിധാന മികവും, പ്രിഥ്വിരാജിന്റെ അഭിനയവുമാണ് എടുത്തു പറയേണ്ട ഘടകങ്ങള്‍.
           മലയാള സിനിമയ്ക്ക് അത്രകണ്ട് പരിചയമില്ലാത്ത 'റോഡ്‌ മൂവി' വിഭാഗത്തില്‍ ഉള്‍പ്പെട്ട ചിത്രമായിരുന്നു നീലാകാശം-പച്ചക്കടല്‍-ചുവന്ന ഭൂമി. ചാപ്പാകുരിശ് എന്ന ചിത്രത്തിലൂടെ കഴിവ് തെളിയിച്ച സമീര്‍ താഹിറിന്റെ സംവിധാനത്തില്‍ പിറവിയെടുത്ത ഈ ചിത്രത്തില്‍ പ്രധാന താരങ്ങളായെത്തിയത് ദുല്‍ക്കര്‍ സല്‍മാനും, സണ്ണി വെയ്നുമായിരുന്നു. മണിപ്പൂരി നടി സര്‍ജുബാലയും ഒരു പ്രധാന വേഷം കൈകാര്യം ചെയ്തിരിക്കുന്നു. ചിത്രത്തില്‍ ഗിരീഷ് ഗംഗാധരന്‍ ഒപ്പിയെടുത്ത ദൃശ്യങ്ങള്‍ അതീവ സുന്ദരമാണ്. നാഗാലാന്റിലുള്ള തന്റെ കാമുകിയേത്തേടി ഒരു യുവാവ് കേരളത്തില്‍ നിന്നും തന്റെ സുഹൃത്തിനോടൊപ്പം ബൈക്കില്‍ യാത്ര തിരിക്കുന്നതും, തുടര്‍ന്നുണ്ടാകുന്ന സംഭവങ്ങളുമാണ് ഈ ചിത്രത്തില്‍ പ്രതിപാദിക്കപ്പെടുന്നത്. അഭിനേതാക്കള്‍ ആരും മോശമാക്കിയില്ല. ക്ലൈമാക്സ് ഒന്നു കൂടി നന്നാക്കിയിരുന്നെങ്കില്‍ ഈ സിനിമ കുറച്ചു കൂടി മികച്ചതാവുമായിരുന്നു.
            ഏറെ അവകാശവാദങ്ങളോടെയായിരുന്നു കളിമണ്ണ്‍ എന്ന ചിത്രം പ്രദര്‍ശനത്തിനെത്തിയത്. ഗര്‍ഭിണിയായ ഒരു   നായികയെ അഭിനയിക്കാന്‍ കിട്ടിയപ്പോള്‍ ബ്ലസി എന്ന സംവിധായകന്‍ പടച്ചെടുത്ത ഒരു ചിത്രം മാത്രമായിരുന്നു കളിമണ്ണ്‍. കുറെ വിവാദങ്ങളല്ലാതെ മറ്റൊന്നും സംഭാവന ചെയ്യാന്‍ ഈ ചിത്രത്തിനായില്ല. മമ്മൂട്ടി, റസൂല്‍ പൂക്കുട്ടി, സലിം അഹമ്മദ്‌, മധു അമ്പാട്ട് എന്നീ പ്രതിഭകളുടെ ഒത്തുചേരലിന് വേദിയായ ചിത്രമായിരുന്നു കുഞ്ഞനന്തന്റെ കട. കുഞ്ഞനന്തനെ അവതരിപ്പിച്ച മമ്മൂട്ടി തന്റെ വേഷം വളരെ ഭംഗിയായി അവതരിപ്പിച്ചുവെങ്കിലും ആദ്യ ചിത്രമായ ആദാമിന്റെ മകന്‍ അബുവിനോളം മികച്ച പ്രകടനം കാഴ്ച വയ്ക്കാന്‍ സലിം അഹമ്മദിനായില്ല. മലയാളത്തിലെ രണ്ട് മുന്‍നിര സംവിധായകരുടെ ചിത്രങ്ങള്‍ ആഗസ്റ്റില്‍ പ്രദര്‍ശനത്തിനെത്തിയെങ്കിലും ഇരു ചിത്രങ്ങളും നിരാശ മാത്രമാണ് സമ്മാനിച്ചത്. മമ്മൂട്ടിയെ  നായകനാക്കി  രഞ്ജിത്ത് ഒരുക്കിയ കടല്‍ കടന്ന് ഒരു മാത്തുക്കുട്ടിയും, കുഞ്ചാക്കോ ബോബനെ നായകനാക്കി ലാല്‍ ജോസ് സംവിധാനം നിര്‍വ്വഹിച്ച പുള്ളിപ്പുലികളും ആട്ടിന്‍ക്കുട്ടിയും ആയിരുന്നു ഈ ചിത്രങ്ങള്‍.

  • പുതുമയും പഴമയുമായി സെപ്റ്റംബര്‍:
              സെപ്റ്റംബറില്‍ പുറത്തിറങ്ങിയ രണ്ട് ചിത്രങ്ങളായിരുന്നു 24 നോര്‍ത്ത് കാതം, ഏഴാമത്തെ വരവ് എന്നിവ. 24 നോര്‍ത്ത് കാതം ശ്രദ്ധേയമായത് അത് കൈകാര്യം ചെയ്ത പ്രമേയത്തിലെ പുതുമ കൊണ്ടായിരുന്നുവെങ്കില്‍ ഏഴാമത്തെ വരവിനെ ശ്രദ്ധേയമാക്കിയത് ഉള്ളടക്കത്തിലെ പഴമയായിരുന്നു. 24 നോര്‍ത്ത് കാതം എന്ന ചിത്രത്തില്‍ 'ഒബ്സസീവ് കമ്പല്‍സീവ് ഡിസോഡര്‍' എന്ന രോഗമുള്ള ഹരികൃഷ്ണന്‍ എന്ന യുവാവായി ഫഹദ് ഫാസില്‍ വേഷമിട്ടു. ഒരു ഹര്‍ത്താല്‍ ദിവസം ഹരികൃഷ്ണന്‍ അവിചാരിതമായി പരിചയപ്പെടുന്ന ഗോപാലകൃഷ്ണന്‍ മാഷോടും(നെടുമുടി വേണു), നാരായണിയോടുമൊപ്പം(സ്വാതി റെഡ്ഡി) നടത്തുന്ന യാത്രയും അത് അയാളുടെ ജീവിതത്തിലുണ്ടാക്കുന്ന മാറ്റങ്ങളിലൂടെയുമാണ് ചിത്രത്തിന്റെ കഥ വികാസം പ്രാപിക്കുന്നത്.
            കാലം തെറ്റി വന്ന ചിത്രമായിരുന്നു എം.ടി-ഹരിഹരന്‍ കൂട്ടുകെട്ടില്‍ പിറവിയെടുത്ത ഏഴാമത്തെ വരവ്. ചുരുങ്ങിയതൊരു ഇരുപത്തേഴ്‌ കൊല്ലം മുമ്പെങ്കിലും ഇറങ്ങേണ്ടിയിരുന്ന ചിത്രം. മൂന്ന് പതിറ്റാണ്ടുകള്‍ക്ക് മുമ്പ് പാതിയില്‍ വച്ച് ചിത്രീകരണമുപേക്ഷിച്ച 'എവിടെയോ ഒരു ശത്രു' എന്ന ചിത്രത്തിന്റെ പുനസൃഷ്ടിയായിരുന്നു ഇത്. സുകുമാരനെ നായകനാക്കിയായിരുന്നു ആദ്യ സിനിമയുടെ ചിത്രീകരണം ആരംഭിച്ചിരുന്നതെങ്കില്‍ ഏഴാമത്തെ വരവില്‍ ആ വേഷം ചെയ്യാനുള്ള നിയോഗം സുകുമാരന്റെ മകനായ ഇന്ദ്രജിത്തിനായിരുന്നു. കാടിന്റെ വന്യത ഒപ്പിയെടുക്കുന്നതില്‍  ഛായാഗ്രാഹകനായ എസ് കുമാര്‍ വിജയിച്ചു.
            നാല് ഗര്‍ഭിണികളുടേയും, അവരെ ചികിത്സിക്കുന്ന സക്കറിയ എന്ന ഡോക്ടറുടേയും കഥ പറഞ്ഞുകൊണ്ടാണ് സക്കറിയായുടെ ഗര്‍ഭിണികള്‍ പുറത്തിറങ്ങിയത്. വ്യത്യസ്ത അവസ്ഥകളിലും, ജീവിതസാഹചര്യങ്ങളിലുമുള്ളവരാണ് നാല് ഗര്‍ഭിണികളും. അവരെ നാലുപേരെയും കൂട്ടി യോജിപ്പിക്കുന്ന കണ്ണിയാണ് സക്കറിയ. ബ്ലസിയുടെ ഗര്‍ഭിണിയേക്കാള്‍ മെച്ചവും തരക്കേടില്ലാത്തതുമായ ഒരു ചിത്രമാണ് സക്കറിയായുടെ ഗര്‍ഭിണികള്‍.
           അസിസ്റ്റന്റ് ഡയറക്ടറില്‍ നിന്നും ഡയറക്ടര്‍ സ്ഥാനത്തേക്ക് മാര്‍ത്താണ്ഡന് സ്ഥാനക്കയറ്റം ലഭിച്ചത് മമ്മൂട്ടി നായകനായ ദൈവത്തിന്റെ സ്വന്തം ക്ലീറ്റസ് എന്ന ചിത്രത്തിലൂടെയായിരുന്നു. ഒരു സൂപ്പര്‍താര ചിത്രത്തിനു വേണ്ട ചേരുവകളെല്ലാം കുത്തി നിറച്ചതിനാല്‍ മമ്മൂട്ടിയുടെ ആരാധകരെ ചിത്രം നിരാശപ്പെടുത്തിയിട്ടുണ്ടാവില്ല. അതിനപ്പുറം തന്റെ ആദ്യ ചിത്രത്തെ ഒരു നല്ല സൃഷ്ടിയാക്കി മാറ്റാന്‍ സംവിധായകന് കഴിഞ്ഞില്ല. ദിലീപ് നായകനായ ശൃംഗാരവേലനായിരുന്നു  സെപ്റ്റംബറില്‍ പുറത്തിറങ്ങിയ മറ്റൊരു ചിത്രം. കുറച്ച് കാലമായി ദിലീപ് സിനിമകളില്‍ കാണാറുള്ള എല്ലാ ചേരുവകളും സമാസമം ചേര്‍ത്ത് തയ്യാറാക്കിയ ഒരു സിനിമയെന്നതിലുപരി മാറ്റൊരു വിശേഷണവും ആ ചിത്രം അര്‍ഹിക്കുന്നില്ല.

  • മാറ്റ് കുറഞ്ഞ സ്വര്‍ണവും നൂല് പൊട്ടിയ പട്ടവും:
         ആഷിഖ് അബു സംവിധാനം ചെയ്ത ചിത്രമായിരുന്നു ഇടുക്കി ഗോള്‍ഡ്‌. സന്തോഷ്‌ എച്ചിക്കാനത്തിന്റെ അതേ പേരിലുള്ള കഥയാണ് ഈ സിനിമയ്ക്കാധാരമായത്. 'അതിഭീകരമാം വിധം സാധാരണം' എന്ന ടാഗ് ലൈനോടു കൂടി യാതൊരുവിധ  അവകാശവാദങ്ങളുമില്ലാതെയോ അത്തരമൊരു പ്രതീതി ജനിപ്പിച്ചുകൊണ്ടോ ആണ് ഇടുക്കി ഗോള്‍ഡ്‌ പ്രദര്‍ശനത്തിനെത്തിയത്. പില്‍ക്കാലത്ത് സഹാപാഠികളായിരുന്ന ഒരു കൂട്ടം മദ്ധ്യവയസ്ക്കരുടെ ഒത്തുചേരലും, ഇടുക്കി ഗോള്‍ഡ് എന്ന കഞ്ചാവ് തേടിയുള്ള അവരുടെ യാത്രയുമൊക്കെയാണ് ഇതില്‍ പ്രതിപാദിക്കപ്പെടുന്നത്. ഒരു ശരാശരി ചിത്രമാവാന്‍ മാത്രമേ ഇടുക്കി ഗോള്‍ഡിനായുള്ളൂ.
          ഛായാഗ്രാഹകന്‍ അഴകപ്പന്റെ പ്രഥമ സംവിധാന സംരഭമായിരുന്നു  'പട്ടം പോലെ'. തിരക്കഥയിലേയും, സംവിധാനത്തിലേയും പാളിച്ചകള്‍ കൊണ്ടും, ക്ലീഷേകളുടെ അതിപ്രസരം കൊണ്ടും നിരാശ മാത്രമാണ് ചിത്രം സമ്മാനിച്ചത്. ദിലീപ് ചിത്രങ്ങളായ സൗണ്ട് തോമ, ശൃംഗാരവേലന്‍  എന്നീ സിനിമാകോപ്രായങ്ങളുടെ പാത വിജി തമ്പി സംവിധാനം ചെയ്ത നാടോടിമന്നനും പിന്തുടര്‍ന്നു. ദിലീപ് എന്ന കഴിവുള്ള നടന് ഇങ്ങനെയുള്ള മോശം വേഷങ്ങള്‍ മാത്രം നല്‍കാതിരിക്കാന്‍ ഇനിയെങ്കിലും മലയാള സിനിമാലോകം ശ്രദ്ധിക്കണം.

  • അടിച്ചുയര്‍ന്ന തിരയും, സുഗന്ധം പരത്തിയ ചന്ദനത്തിരിയും:
        ഒരു ട്രയോളജിയുടെ ആദ്യ ഭാഗമായാണ് തിര എന്ന വിനീത് ശ്രീനിവാസന്‍ ചിത്രം തിയേറ്ററുകളിലെത്തിയത്. തുടര്‍ച്ചയ്ക്കുള്ള സാദ്ധ്യതകള്‍ നിലനിര്‍ത്തിയാണ് ചിത്രം അവസാനിക്കുന്നതും. ഇന്ത്യന്‍ സിനിമകളിലും, വിദേശ സിനിമകളിലും കേട്ടു പഴകിയ ഒരു പ്രമേയമായിരുന്നിട്ടു കൂടി അതിന്റെ അവതരണശൈലി കൊണ്ട് തിര വ്യത്യസ്തത പുലര്‍ത്തുകയും ഒരു നല്ല കാഴ്ചാനുഭവം സമ്മാനിക്കുകയും ചെയ്തു. പൈങ്കിളിപ്രണയത്തിന്റെ കഥ പറഞ്ഞ തട്ടത്തിന്‍ മറയത്ത് എന്ന ചിത്രത്തിനു ശേഷം ഒരു സംവിധായകന്‍ എന്ന നിലയില്‍ വിനീതിനുണ്ടായ വളര്‍ച്ച നമുക്ക് ഈ ചിത്രത്തില്‍ കാണാം. എടുത്തു പറയേണ്ടത് ശോഭന എന്ന അഭിനേത്രിയുടെ മികച്ച പ്രകടനം തന്നെയാണ്. പുതുമുഖമായ ധ്യാന്‍ ശ്രീനിവാസനും നല്ല അഭിനയം കാഴ്ച വച്ചു.
       ജയസൂര്യയുടെ പുണ്യാളന്‍ അഗര്‍ബത്തീസ് ആണ് നവംബര്‍ മാസത്തില്‍ പുറത്തിറങ്ങിയ മറ്റൊരു നല്ല ചിത്രം. ആനപ്പിണ്ടത്തില്‍ നിന്നും ചന്ദനത്തിരി ഉണ്ടാക്കുന്ന കമ്പനി തുടങ്ങുകയാണ് ജയസൂര്യയുടെ നായക കഥാപാത്രമായ ജോയ് താക്കോല്‍ക്കാരന്‍. തുടര്‍ന്നുണ്ടാകുന്ന സംഭവവികാസങ്ങള്‍ തൃശൂര്‍ ഭാഷയുടെ മേമ്പൊടിയോടെ പറഞ്ഞിരിക്കുകയാണ് സംവിധായകനായ രഞ്ജിത്ത് ശങ്കര്‍.
         ഒരേ സമയം മലയാള സിനിമയോടും,മലയാളത്തിലെ എക്കാലത്തേയും ക്ലാസിക്ക് ചിത്രങ്ങളിലൊന്നായ മണിച്ചിത്രത്താഴിനോടും പ്രിയദര്‍ശന്‍ എന്ന സംവിധായകന്‍ ചെയ്ത ദ്രോഹത്തിന്റെ അനന്തര ഫലമായിരുന്നു ഗീതാഞ്ജലി എന്ന ചിത്രം. മറ്റു പല സിനിമകളുമായുള്ള സാമ്യവും, മോശം തിരക്കഥയും റിലീസിനു മുമ്പ് പ്രേകഷകര്‍ വളരെയേറെ പ്രതീക്ഷയര്‍പ്പിച്ച ഈ ചിത്രത്തെ ഒന്നുമല്ലാതാക്കി മാറ്റി.

  • ദൃശ്യവിസ്മയം സമ്മാനിച്ച് ഡിസംബര്‍:
             വളരെ മികച്ചൊരു കഥയുടെ അതിനൊത്ത ദൃശ്യാവിഷ്കാരമാണ് ഈ ചിത്രം. തുടക്കം മുതല്‍ ചിരിപ്പിച്ചും ചിന്തിപ്പിച്ചും മുന്നേറിക്കൊണ്ടിരുന്ന സിനിമയുടെ ഗതി മാറുന്നത് ഇന്റര്‍വെലിനു തൊട്ടു മുമ്പാണ്. പിന്നീടങ്ങോട്ട് ഒടുക്കം വരെയും പ്രേക്ഷകനെ സസ്പെന്‍സിന്റെ മുള്‍മുനയില്‍ നിര്‍ത്തുന്നുണ്ട് ഈ ചിത്രം. മണ്ണിനേയും, സിനിമയേയും ഇഷ്ടപ്പെടുന്ന ജോര്‍ജ്ജ് കുട്ടിയുടെയും (മോഹന്‍ലാല്‍), അയാളുടെ കുടുംബത്തിന്റെയും കഥയാണ് ദൃശ്യം പറയുന്നത്. പെട്ടന്നൊരു നാള്‍ അയാളുടെ കുടുംത്തെ തന്നെ തകര്‍ത്തെറിയാന്‍ കെല്‍പ്പുള്ള ഒരു സംഭവം അവരുടെ ജീവിതത്തില്‍ ഉണ്ടാകുന്നു. ആ ഭീകരമായ പ്രതിസന്ധിയെ തരണം ചെയ്യാനായുള്ള ജോര്‍ജ്ജ് കുട്ടിയുടെയും കുടുംബത്തിന്റെയും ശ്രമങ്ങളിലൂടെയാണ് സിനിമയുടെ കഥ വികസിക്കുന്നത്. ഡിറ്റക്റ്റീവ് മുതല്‍ മെമ്മറീസ്‌ വരെയുള്ള ഓരോ ചിത്രങ്ങളിലും ഒരു സംവിധായകന്‍ എന്ന നിലയില്‍ ജീത്തു ജോസഫിനുണ്ടായ പുരോഗതി നാം കണ്ടതാണ്. ആ പതിവ് ഈ ചിത്രത്തിലും അദ്ദേഹം ആവര്‍ത്തിക്കുന്നു. ജീത്തു ജോസഫ് തന്നെയാണ് ചിത്രത്തിന്റെ തിരക്കഥാകൃത്ത്. 'ദൃശ്യത്തെ' വളരെ നല്ലൊരു ഒരു ദൃശ്യവിരുന്നാക്കി മാറ്റിയതില്‍ ചിത്രത്തിന്റെ തിരക്കഥയ്ക്കുള്ള പങ്ക് എടുത്തു പറയേണ്ടതാണ്. സുജിത് വാസുദേവ് ഒപ്പിയെടുത്ത ക്യാമറക്കാഴ്ച്ചകളും നന്നായി. മോഹന്‍ലാല്‍ എന്ന മഹാനടന്റെ അഭിനയപാടവത്തെ ഇത്രയധികം ചൂഷണം ചെയ്യാന്‍ അടുത്ത കാലത്തൊന്നും വേറൊരു സംവിധായകനും കഴിഞ്ഞിട്ടില്ല. എണ്‍പതുകളിലും, തൊണ്ണൂറുകളിലും നാം കാണുകയും ഇഷ്ടപ്പെടുകയും ചെയ്ത മോഹന്‍ലാലിന്റെ പല മാനറിസങ്ങളും പിന്നീട് അദ്ദേഹത്തിന്റെ ചിത്രങ്ങളില്‍ നിന്നും അന്യമാവുകയുണ്ടായി. അവയുടെ മടങ്ങിവരവ് കൂടിയാണ് ഈ ചിത്രത്തിലൂടെ സംഭവിച്ചിരിക്കുന്നത്. 
               മലയാളത്തിലെ എക്കാലത്തേയും മികച്ച കലാലയ സിനിമകളിലൊന്നായിരുന്നു ക്ലാസ്മേറ്റ്സ്. ലാല്‍ജോസ്-ജെയിംസ് ആല്‍ബര്‍ട്ട് കൂട്ടുകെട്ടില്‍ പിറന്ന ഈ ചിത്രം ഒരു തരംഗം തന്നെ സൃഷ്ടിക്കുകയുണ്ടായി. ഏഴു സുന്ദര രാത്രികള്‍ എന്ന ചിത്രത്തിലൂടെ ആ കൂട്ടുകെട്ട് വീണ്ടും ഒന്നിച്ചപ്പോള്‍ പക്ഷേ നിരാശയായിരുന്നു ഫലം. എബി(ദിലീപ്) തന്റെ വിവാഹത്തിനു മുമ്പുള്ള ബാച്ചിലര്‍ പാര്‍ട്ടിക്കിടെ പഴയ കാമുകിയും വിവാഹിതയുമായ സിനിയെ(റീമ കല്ലിങ്കല്‍) സ്വന്തം  വിവാഹത്തിന് ക്ഷണിക്കാനുള്ള തീരുമാനമെടുക്കുന്നു. പിന്നീട് വിവാഹത്തിനു മുമ്പുള്ള ഏഴു ദിവസങ്ങളില്‍ എബിയുടെ ജീവിതത്തില്‍ സംഭവിക്കുന്ന കാര്യങ്ങളാണ് ചിത്രം പറയുന്നത്.
             മലയാളികള്‍ക്ക് ചിരിപ്പിക്കുകയും, ചിന്തിപ്പിക്കുകയും ചെയ്യുന്ന ഒട്ടേറെ സിനിമകള്‍ സമ്മാനിച്ച സംവിധായകനാണ് സത്യന്‍ അന്തിക്കാട്. എന്നാല്‍ കുറച്ച് കാലമായി അദ്ദേഹത്തിന്റെ സിനിമകള്‍ നിരാശ മാത്രമാണ് പ്രേക്ഷകര്‍ക്ക് നല്‍കുന്നത്. സത്യന്‍ അന്തിക്കാടിന്റെ ഏറ്റവും പുതിയ ചിത്രമായ 'ഒരു ഇന്ത്യന്‍ പ്രണയകഥ' കണ്ടിറങ്ങുന്നവരുടെ മുഖത്തും ഈ നിരാശ പ്രകടമാണ്. സത്യന്‍ അന്തിക്കാടിന്റെ പഴയ ചിത്രങ്ങളെ അപേക്ഷിച്ച് മോശമാണെങ്കിലും അദ്ദേഹത്തിന്റെ തന്നെ അടുത്തകാലത്തിറങ്ങിയ സ്നേഹവീട്, പുതിയ തീരങ്ങള്‍ തുടങ്ങിയ ചിത്രങ്ങളേക്കാള്‍ മെച്ചമാണ് ഈ ചിത്രം.

  • അഭിനയം, തിരക്കഥ, സംവിധാനം:
            അന്നയും റസൂലിലും തുടങ്ങി ഒരു ഇന്ത്യന്‍ പ്രണയ കഥ വരെ 12 ചിത്രങ്ങളില്‍ വേഷമിട്ട ഫഹദ് ഫാസിലിന് മോശം സിനിമകളില്‍ പോലും സ്വന്തം കഥാപാത്രങ്ങളെ മനോഹരമാക്കാന്‍ കഴിഞ്ഞു. സെല്ലുലോയ്ഡ്‌, മുംബൈ പോലീസ്, മെമ്മറീസ് എന്നീ ചിത്രങ്ങളിലൂടെ മൂന്ന് വ്യത്യസ്ത കഥാപാത്രങ്ങള്‍ക്ക് ജീവന്‍ നല്‍കിയ പ്രിഥ്വിരാജും പ്രേക്ഷകരുടെ മനം കവര്‍ന്നു. തുടര്‍ച്ചയായ മോശം കഥാപാത്രങ്ങളെ അവതരിപ്പിക്കുക വഴി നിരാശ മാത്രം നല്‍കിയ മോഹന്‍ലാല്‍ ദൃശ്യം എന്ന ഒരൊറ്റ ചിത്രത്തിലൂടെ അമ്പരപ്പിക്കുന്ന തിരിച്ചുവരവ് നടത്തി. ഇമ്മാനുവല്‍, കുഞ്ഞനന്തന്റെ കട എന്നീ ചിത്രങ്ങളില്‍ മമ്മൂട്ടിയും മികച്ച അഭിനയം കാഴ്ച വച്ചു. നടിമാരില്‍ എടുത്തു പറയാവുന്നത് തിര എന്ന ചിത്രത്തില്‍ ഡോക്ടര്‍ രോഹിണിയായി വേഷമിട്ട ശോഭനയുടേയും, ഷട്ടര്‍ എന്ന ചിത്രത്തിലെ സജിത മഠത്തിലിന്റേയും അഭിനയം മാത്രമായിരുന്നു.
          ജീത്തു ജോസഫ് (ദൃശ്യം, മെമ്മറീസ്), ജോയ് മാത്യു(ഷട്ടര്‍), മുംബൈ പോലീസ് (ബോബി-സഞ്ജയ്‌), മുരളി ഗോപി(ലെഫ്റ്റ് റൈറ് ലെഫ്റ്റ്) തുടങ്ങിയവരുടെ തിരക്കഥകള്‍ മികവ് പുലര്‍ത്തി.
            ജീത്തു ജോസഫും, ജോയ് മാത്യുവും സംവിധായകര്‍ എന്ന നിലയിലും കഴിവ് തെളിയിച്ചു. മലയാള ഭാഷയുടെ പിതാവിന്റെ കഥയുമായെത്തിയ കമല്‍, മുംബൈ പോലീസ് അണിയിച്ചൊരുക്കിയ റോഷന്‍ ആന്‍ഡ്രൂസ്, അമേന്‍ എന്ന ചിത്രത്തിലൂടെ നമ്മെ കുമരങ്കരിയിലേക്ക് കൂട്ടിക്കൊണ്ടു പോയ ലിജോ ജോസ് പല്ലിശ്ശേരി, 101 ചോദ്യങ്ങളുമായെത്തിയ സിദ്ധാര്‍ഥ് ശിവ, ശ്യാമപ്രസാദ് (ഇംഗ്ലീഷ്, ആര്‍ട്ടിസ്റ്റ്) തുടങ്ങിയ പ്രതിഭകളുടേയും സംവിധാന മികവ് നാം പോയ വര്‍ഷം അനുഭവിച്ചറിഞ്ഞു.

  • ഉദയവും അസ്തമയവും:
           മാസ്റ്റര്‍ മിനോണ്‍, റീനു മാത്യൂസ്, നൈല ഉഷ, കീര്‍ത്തി സുരേഷ്, ധ്യാന്‍ ശ്രീനിവാസ്, എന്നിങ്ങനെ ഒരു കൂട്ടം അഭിനേതാക്കള്‍ പോയ വര്‍ഷം അരങ്ങേറ്റം കുറിച്ചു. അഭിനേതാക്കളായ സിദ്ധാര്‍ഥ് ശിവ, ജോയ് മാത്യു എന്നിവരുടേയും, ഛായാഗ്രാഹകനായ രാജീവ് രവിയുടേയും സംവിധാനരംഗത്തേയ്ക്കുള്ള ചുവടുവയ്പ്പിനും 2013 സാക്ഷ്യം വഹിച്ചു. അഭിനേതാക്കളായ അഗസ്റ്റിന്‍, ഒറ്റപ്പാലം പപ്പന്‍, സുകുമാരി, സംഗീത സംവിധായകരായ രാഘവന്‍ മാസ്റ്റര്‍, ദക്ഷിണാമൂര്‍ത്തി തുടങ്ങി മലയാള സിനിമയ്ക്ക് ഒട്ടേറെ സംഭാവനകള്‍ നല്‍കിയ പല പ്രതിഭകളും കാലയവനികയ്ക്കുള്ളില്‍ മറയുകയും ചെയ്തു.

  • 2013 ബാക്കി വയ്ക്കുന്നത്:
            മുന്‍വര്‍ഷങ്ങളെ അപേക്ഷിച്ച് ആകെ റിലീസ് ചെയ്ത സിനിമകളുടെ എണ്ണത്തില്‍ വലിയ വര്‍ദ്ധനവാണ് പോയ വര്‍ഷം ഉണ്ടായത്. അവയില്‍ വ്യത്യസ്തമായ പ്രമേയങ്ങളും കാമ്പുള്ള തിരക്കഥകളുമുള്ള ഒരു ഡസനിലധികം സിനിമകള്‍ ഉണ്ടായിരുന്നു എന്നത് മലയാള സിനിമാലോകത്തെ സംബന്ധിച്ചിടത്തോളം സന്തോഷദായകവും, പുതിയ പ്രതീക്ഷകള്‍ക്ക് വക നല്‍കുന്നതുമാണ്. പല ചിത്രങ്ങളും കഥ പറച്ചിലിലും, ദൃശ്യങ്ങളൊരുക്കുന്നതിലുമെല്ലാം നവീന രീതികള്‍ അവലംബിച്ചിരിക്കുന്നതു കാണാം. താരങ്ങളെ നോക്കാതെ സിനിമയുടെ ഗുണം മാത്രം നോക്കി സിനിമയ്ക്ക് കയറുന്ന ഒരു പ്രേക്ഷക സമൂഹം നമ്മുടെ നാട്ടില്‍ രൂപപ്പെട്ടു വരുന്നുണ്ട് എന്നതും ഒരു ശുഭസൂചനയാണ്. പോയ വര്‍ഷം സിനിമകളുടെ എണ്ണത്തിലുണ്ടായ വര്‍ദ്ധനവിന്    പണമുള്ള ആര്‍ക്കും സിനിമയെടുക്കാം എന്ന കാഴ്ചപ്പാടും, സിനിമാ നിര്‍മ്മാണത്തിനാവശ്യമായ ചിലവിലുണ്ടായ കുറവും കാരണമായിട്ടുണ്ടാവാം. ഒരുപാട് സിനിമകള്‍ ഉണ്ടാവുന്നതിനേക്കാള്‍ ആവശ്യം കുറച്ച് നല്ല സിനിമകള്‍ ഉണ്ടാവുക എന്നതാണ് എന്ന സത്യം ഇത്തരത്തില്‍ സിനിമയെടുക്കുന്നവര്‍ മനസ്സിലാക്കേണ്ടിയിരിക്കുന്നു. ഈ വര്‍ഷത്തിലും ഒട്ടേറെ മികച്ച ദൃശ്യാനുഭവങ്ങള്‍ നമ്മെ തേടിയെത്തട്ടെ എന്നാശംസിക്കാം...

എല്ലാവര്‍ക്കും എന്റെ പുതുവത്സരാശംസകള്‍ :-)

36 comments:

  1. ആശംസകള്‍
    വലിയൊരു ഉദ്യമം തന്നെ

    ReplyDelete
    Replies
    1. വളരെയധികം നന്ദി അജിത്തേട്ടാ... :-)

      Delete
  2. സത്യസന്ധമായ നിരീക്ഷണങ്ങള്‍.ഒരു താരത്തിന്റെയും സംവിധായകന്റെയും പക്ഷം പിടിക്കാതെ എഴുതി.ആശംസകള്‍ കൂട്ടുകാരാ.

    ReplyDelete
    Replies
    1. നന്ദി അനീഷ്... :-)

      Delete
  3. Good one! was a nice read!

    ReplyDelete
    Replies
    1. Thank you so much Nevin... :-)

      Delete
  4. Replies
    1. Here I mentioned only the movies that I have seen. I heard that monkey pen is an excellent movie. I will surely include that after watching...Thanks for visiting.... :-)

      Delete
  5. ഓരോ സിനിമയും ചുരുങ്ങിയ വാക്കുകളില്‍ വിലയിരുത്തിയ ഈ ഉദ്യമത്തിന് അഭിനന്ദനങ്ങള്‍.

    ReplyDelete
    Replies
    1. വളരെയധികം നന്ദി... :-)

      Delete
  6. Very good compilation bhai.... the efforts you put into this is very evident..ella maasangalilem movies okke complile cheyhtille, also made it an interesting read... I appreciate that.

    ReplyDelete
  7. നന്നായി ശ്രമം നടത്തി എഴുതിയ ഒരു പോസ്റ്റ്‌..സിനിമ വെറതേ കണ്ടു മറക്കെണ്ടതല്ല; വിലയിരുത്തെണ്ടതാണ് എന്ന് ഈ ലേഖനം വിളിച്ചു പറയുന്നു. നല്ല ഭാഷയും..

    ReplyDelete
    Replies
    1. വളരെയധികം നന്ദി അന്‍വര്‍ക്കാ... :-)

      Delete
  8. Oru nalla cinema undakanamenkil nalla thira kathayum nalla nadan marum venam.oru nalla cinema undakan director vicharichal Mathram pora.
    2013 il irangiya Cinemakale azhathil manasilakkan e lekhanam sahayichu.good job...

    ReplyDelete
  9. മികച്ച ധാരാളം സിനിമകള്‍ ഉണ്ടായ വര്‍ഷമാണ് 2013. അതേപോലെതന്നെ പ്രേക്ഷകര്‍ക്ക് ഉള്‍ക്കൊള്ളാനാവാത്തവിധത്തില്‍ സിനിമകലുടെ ധാരാളിത്തവും. ഇത്രയേറെ സിനിമകള്‍ ഒരുമിച്ചുവരുമ്പോള്‍ വിജയിക്കേണ്ടതും ശ്രദ്ധിക്കപ്പെടേണ്ടതുമായ ചിത്രങ്ങള്‍ പോലും തള്ളിപോകുകയേയുള്ളൂ. എണ്ണക്കൂടുതല്‍ കൊണ്ട് ഒരു കാര്യവുമില്ല..

    നല്ല രീതിയില്‍ എഴുതിയിട്ടുണ്ട്. അഭിനന്ദനങ്ങള്‍

    ReplyDelete
    Replies
    1. വളരെയധികം നന്ദി... :-)

      Delete
  10. സംഗീത് ...നല്ല അവലോകനം ആശംസകള്‍ !

    ReplyDelete
    Replies
    1. വളരെയധികം നന്ദി... :-)

      Delete
  11. അവലോകനം കലക്കി.. (കഴിഞ്ഞ വര്ഷം ഇറങ്ങിയ ഏറ്റവും പൊട്ട സിനിമ ഏതാണ്?)

    ReplyDelete
    Replies
    1. കഴിഞ്ഞ വര്‍ഷം റിലീസ് ആയതില്‍ കൂടുതലും മോശം സിനിമകള്‍ തന്നെയായിരുന്നു... അതുകൊണ്ട് ഏറ്റവും മോശം ഏതാണെന്ന് കണ്ടെത്താന്‍ അല്‍പ്പം പ്രയാസമാണ്... :-)

      Delete
  12. മികച്ച അവലോകനം. ഏറ്റവും ഇഷ്ടപെട്ടത് തലക്കെട്ടുകളാണ്. ആശംസകൾ..:)

    ReplyDelete
    Replies
    1. നന്ദി അരുണ്‍... :-)

      Delete
  13. നല്ലൊരു പഠനം സംഗീത് - സമഗ്രമായ വിലയിരുത്തൽ - ഡോക്ടർ പറഞ്ഞതുപോലെ പാപ്പിലിയോ ബുദ്ധ പോലുള്ള സിനിമകൾ ഈ അവലോകനത്തിൽ പ്രാധാന്യത്തോടെ വരേണ്ടതായിരുന്നു. അത്തരം ചില കാര്യങ്ങൾ മാറ്റിവെച്ചാൽ മികച്ചൊരു വിലയിരുത്തൽ എന്ന രീതിയിൽ ഇത് അഭിനന്ദനം അർഹിക്കുന്നു

    ഒരു കാര്യം കൂടി - ഒരു ബ്ലോഗ് പോസ്റ്റ് എങ്ങിനെ ആയിരിക്കണം എന്നതിന് നല്ലൊരു ഉദാഹരണം കൂടിയാണ് സംഗീതിന്റെ ഈ പഠനം

    ReplyDelete
    Replies
    1. പാപ്പിലിയോ ബുദ്ധ, മങ്കി പെന്‍ എന്നിങ്ങനെ കഴിഞ്ഞ വര്‍ഷം പുറത്തിറങ്ങിയ ചില നല്ല ചിത്രങ്ങള്‍ എനിക്ക് കാണാന്‍ കഴിഞ്ഞില്ല...കാണാത്ത ഒരു ചിത്രത്തെക്കുറിച്ച് അഭിപ്രായം എഴുതുന്നത് ശരിയല്ലല്ലോ എന്നു കരുതിയാണ് അവ ഉള്‍പ്പെടുത്താതിരുന്നത്...ഈ അഭിപ്രായത്തിന് നന്ദി പ്രദീപേട്ടാ... :-)

      Delete
  14. Replies
    1. ബ്ലോഗ്‌ അവലോകനം വായിച്ചു....വളരെ മികച്ച ഒരു ഉദ്യമം... പുതിയ ബ്ലോഗുകളും പോസ്റ്റുകളും പരിചയപ്പെടുത്താനുള്ള ഈ ശ്രമം അഭിനന്ദനീയം തന്നെ... പലതും ഇതുവരെ കാണാത്ത ബ്ലോഗുകളോ വായിക്കാത്ത പൊസ്റ്റുകളോ ഒക്കെയാണ്...
      എന്റെ പോസ്റ്റും ഇതില്‍ ഉള്‍പ്പെടുത്തിയത്തിന്‌ വളരെയധികം നന്ദി.... പാപ്പിലിയോ ബുദ്ധ ഞാന്‍ കാണാത്ത ചിത്രമാണ്..... അതിനാലാണ് പാപ്പിലിയോ ബുദ്ധ ഉള്‍പ്പെടുത്താതിരുന്നത്... ക്ഷമിക്കുക...
      ശ്രമകരമായ ഈ ഉദ്യമത്തിന് ഒരിക്കല്‍ക്കൂടി അഭിനന്ദനങ്ങള്‍...

      Delete
  15. നല്ല അവലോകനം

    ReplyDelete
    Replies
    1. വളരെയധികം നന്ദി... :-)

      Delete
  16. ളരെ മികച്ച അവലോകനം..... ആശംസകൾ

    ReplyDelete
    Replies
    1. വളരെയധികം നന്ദി... :-)

      Delete
  17. മലയാള സിനിമ പെറ്റിട്ട
    ഈ പന്തിരുകുലം വളരെ ഇഷ്ട്ടപ്പെട്ടു കേട്ടൊ സംഗീത്
    എല്ലാം ആറ്റിക്കുറുക്കി വിലയിരുത്തിയിരിക്കുന്നൂ

    ReplyDelete
    Replies
    1. ഇഷ്ടമായി എന്നറിഞ്ഞതില്‍ വളരെ സന്തോഷം... :-)

      Delete
  18. ലേറ്റായിപ്പോയി വരാന്‍..വന്നതു നഷ്ടമായില്ല, നാട്ടില്‍ നിന്നു പോകുമ്പോള്‍ വാങ്ങേണ്ട സിഡികളുടെ ലിസ്റ്റ് ആയി..വട്ട് ജയനായും, കുമരംങ്കരിയിലെ പുണ്യാളനായും വേഷമിട്ട ഇന്ദ്രജിത്തും 2013 ലെ ശ്രദ്ധയാര്‍ജ്ജിച്ച നടനാണെന്നു എനിക്കു തോന്നി ..

    ReplyDelete
    Replies
    1. ശരിയാണ് രണ്ട് ചിത്രങ്ങളിലും ഇന്ദ്രജിത്തിന്റെ അഭിനയം മികച്ചതായിരുന്നു...ഏഴാമത്തെ വരവ്, 101 ചോദ്യങ്ങള്‍ ഈ ചിത്രങ്ങളിലും നല്ല അഭിനയം തന്നെയായിരുന്നു...എനിക്ക് പലപ്പോഴും തോന്നിയിട്ടുണ്ട് ഇന്ദ്രജിത്ത് ഭാഗ്യം തീരെയില്ലാത്ത ഒരു മികച്ച നടനാണെന്ന്...

      Delete